भक्तपुर उद्योग वाणिज्य संघको ३३ औं साधारण सभा सम्पन्न

भक्तपुर, २९ पुस । भक्तपुर उद्योग वाणिज्य संघको ३३ औं वार्षिक साधारण सभा सम्पन्न भएको छ । सभाको उद्घाटन गर्दै नेपाल उद्योग वाणिज्य महासंघका अध्यक्ष शेखर गोल्छाले साना तथा मझौला उद्यम व्यवसायको पुर्नत्थानका लागि मौद्रिक नीतिमार्फत आएका राहत कार्यक्रम विना अवरोध लागू गर्न सरकारको ध्यानाकर्षण गराउनुभयो ।

यसैगरी महासंघले प्रतिवर्ष चार लाख रोजगारी सृजना गर्ने, दोहोरो आर्थिक वृद्धि र आयात प्रर्तिस्थापन गरी निर्यात वृद्धिको लक्ष्य राखेर भिजन पेपर तयारी गर्दै रहेको बताउनुभयो ।

कार्यक्रममा भक्तपुर उद्योग वाणिज्य संघका अध्यक्ष प्रदिप श्रेष्ठले जिल्लाको व्यवसायिक प्रवद्र्धनका लागि संघ सदैव तत्पर रहेको बताउनुभयो । उहाँले जिल्ला व्यवसायीहरुले भोग्दै आएका समस्याहरु माथि प्रकाश पार्दै राज्यका सम्बन्धित निकायहरुबाट शिघ्र समस्या समाधानमा पहल हुनु पर्नेमा जोड दिनुभयो ।

त्यसअवसरमा राष्ट्रिय सतर्कता केन्द्रका सचिव मणिराम गेलालले उत्पादन र सेवा क्षेत्रको जिम्मा निजी क्षेत्रलाई हस्तान्तरण गरिसकेको हुदा राज्यले केवल सहजकर्ताको मात्र भूमिका खेल्ने भन्दै राज्यको आर्थिक वृद्धि हुनुमा निजीक्षेत्रले आर्जन गर्ने मुनाफाले महत्वपूर्ण भूमिका बताउनु भयो ।

त्यस्तै संसद सचिवालयका सचिव सुदर्शन खड्काले निजी क्षेत्रको समस्या सरकारलाई ज्ञात भएको भन्दै निजी क्षेत्रको विकासमा सरकारले पनि सक्दो योगदान पुर्याएको चर्चा गर्नुभयो । उहाँले राज्यको एक अभिन्न अंग निजी क्षेत्र भएकाले निजीक्षेत्रलाई राज्यले प्रोत्साहित गर्नै पर्ने दायित्व रहेको औल्याउनुभयो ।

कार्यक्रममा नेउवामहासंघ जिल्ला नगर उपाध्यक्ष दिनेश श्रेष्ठले निजी क्षेत्रका लागि बनाइने ऐन कानूनहरु उद्यमी व्यवसायीसंग छलफल गरेर बनाइएको भए कार्यान्वयन गर्न धेरै सहज हुने बताउनुभयो ।

त्यसअवसरमा राष्ट्रिय सतर्कता केन्द्रका सचिव मणिराम गेलाल, संसद सचिवालयका सचिव सुदर्शन खड्का, अर्थ मन्त्रालयका सहसचिव रामेश्वर दंगाल, प्रहरी नायव उपरीक्षक गोविन्द कार्की, सशस्त्र प्रहरी नायव उपरीक्षक पंकज पौडेल, ललितपुर उपमहानगरपालिका नगर प्रहरी प्रमुख सिताराम हाछेथु, आरएनए १६ का टिम लिडर अरुण सैजूलाई सम्मान गरिएको थियो ।

त्यस्तै उद्योग वाणिज्य संघका वरिष्ठ उपाध्यक्ष शिवप्रसाद मानन्धर, संघ कै वस्तुगततर्फका उपाध्यक्ष रोशन भोयद्यो, नेपाल उद्योग वाणिज्य महासंघ वाग्मती प्रदेशका अध्यक्ष दिलसुन्दर श्रेष्ठ, वाग्मती प्रदेशकै उपाध्यक्ष दुर्गाराज श्रेष्ठ र वाग्मती प्रदेश कार्यसमिति सदस्य कैलाश पलाञ्चोकेलाई पनि कार्यक्रममा सम्मान गरिएको थियो ।

यस्तै भक्तपुरका उत्कृष्ट नियातकर्ताहरु मध्ये भारतर्फका उत्कृष्ट निर्यातकर्ताहरु सिद्धि गणेश तरकारी तथा प्रशोधन र रिजन एण्ड सृजन पस्मिना र तेस्रो मुलुकतर्फ हिमालयन निटवेयर प्रा.लि., ब्ल्याक फेसन र प्रधानांङ्ग एपेरियल्सलाई सम्मान गरिएको थियो ।

कार्यक्रममा संघबाट प्रकाशन गरिएको स्मारिका २०७६/०७७ विमोचन गरिएको थियो । संघका वरिष्ठ उपाध्यक्ष शिवप्रसाद मानन्धरले धन्यवाद ज्ञापन गर्नु भएको उक्त कार्यक्रममा जिल्ला समन्वय समिति भक्तपुरका अध्यक्ष नवराज गेलाल र भक्तपुर ईट्टा उद्योग व्यवसायी संघका अध्यक्ष नातीभाई हेम्बाले शुभकामना मन्तव्य राख्नु भएको थियो । कार्यक्रमको सभापतित्व संघका अध्यक्ष प्रदिप श्रेष्ठले गर्नु भएको थियो ।