शंखधर प्रतिष्ठानलाई राष्ट्रिय अन्तर्राष्ट्रिय रुपमा विस्तार गरौंः नगर प्रमुख श्रेष्ठ

भक्तपुर, २९ पुस । राष्ट्रिय विभूति शंखधर साख्वाः प्रतिष्ठानको १५ औं साधारणसभा सम्पन्न भएको छ । मध्यपुर थिमि नगरपालिकाका नगरप्रमुख मदनसुन्दर श्रेष्ठले पानसमा दीपप्रज्ज्वलन गरी उद्घाटन गर्नु भएको थियो ।

नगर प्रमुख श्रेष्ठले प्रतिष्ठानलाई संस्थागत विकास गर्न विभिन्न योजनाहरु बनाई अघि बढ्न सुझाव दिनुभयो । प्रतिष्ठानलाई सहयोग र हातेमालो गर्न नगरपालिका सधैं तयार गरेको उहाँले बताउनुभयो । उहा“ले प्रतिष्ठानलाई मध्यपुरमा मात्र नभई राष्ट्रिय अन्तर्राष्ट्रिय रुपमा विस्तार गर्न आग्रह गर्नुभयो ।

प्रतिष्ठानका निवर्तमान अध्यक्ष श्यामकृष्ण मानन्धरले प्रतिष्ठान यहा“सम्म आउन नेपाल सरकार, मध्यपुर थिमि नगरपालिका, नगरप्रमुख मदनसुन्दर श्रेष्ठ, संघसंस्था एवं विद्वान व्यक्तित्वहरु र स्थानीय जनसमुदायको ठूलो सहयोग रहेको बताउनुभयो । नेपाल सम्वत् र राष्ट्रिय विभूति शंखधर साख्वाःको बारेमा प्रचारप्रसार एवं अनुसन्धान गर्न प्रतिष्ठानले ठूलो भूमिका खेलेको उहाँको भनाई थियो ।

प्रतिष्ठानका उपाध्यक्ष ज्ञानराम श्रेष्ठले संचालन गर्नुभएको उक्त साधारणसभामा सचिव ज्ञानकृष्ण श्रेष्ठले आ.व. २०७६/७७ को प्रगति प्रतिवेदन तथा आ.व. २०७७/७८ को कार्ययोजना प्रस्तुत गर्नुभएको थियो । सोही सभामा कोषाध्यक्ष प्रतिवेदन तथा लेखापरीक्षक प्रतिवेदन प्रस्तुत गरी सर्वसम्मतबाट पारित गरेको थियो ।

प्रतिष्ठानका अध्यक्ष एवं कार्यक्रमका सभापति चन्दनकृष्ण श्रेष्ठले शंखधर प्रतिष्ठानका गतिबिधीकाबारेमा चर्चा गर्नुभएको थियो ।