काठमाडौं,२९ पौष ।
परराष्ट्रमन्त्री प्रदीप कुमार ज्ञवालीको भारत भ्रमणका क्रममा मुलुकलाई न्यून लाभ हुने खालका दीर्घकालीन महत्वका सम्झौता नगर्न नागरिक अगुवाहरुले सुझाव दिएका छन् । आज अख्तियारका पूर्व प्रमुख आयुक्त सूर्यनाथ उपाध्याय, पूर्व मुख्यसचिव लीलामणि पौडेल, डा. सोमलाल सुवेदी, पूर्व गभर्नर दिपेन्द्रबहादुर क्षेत्री लगायत १५ जना नागरिक अगुवाले विज्ञप्तिमार्फत मुलुकमा तरल राजनैतिक अवस्था रहँदा दीर्घकालमा क्षति पुग्ने वा गम्भीर दायित्व सिर्जना हुने गरी सहमति जनाउने वा समझदारी नगर्न आग्रह गर्नुभएको हो । मुलुकमा तरल राजनैतिक अवस्था रहँदा हाम्रो नेतृत्व अनेक प्रकारको चाप र दबाबमा रहने र हाम्रो आफ्नै कमजोरीबाट एकपक्षीय वा असमान लाभ उठाउन बाह्यपक्ष सक्रिय रहने समेत विज्ञप्तीमा उल्लेख छ । उहाँहरुले कोभिड(१९ विरूद्धको भ्याक्सिन प्राप्त गर्ने विषय तत्कालको प्राथमिकता हुन सक्ने पनि बताउनुभएको छ ।
