अग्रेजी नयाँवर्षमा स्वदेशी पर्यटकले भरिए रानीकोटदेखि नगरकोटसम्मका पर्यटकीयस्थल

अग्रेजी नयाँ वर्ष मनाउन भक्तपुरका पर्यटकीय क्षेत्र रानीकोटदेखि नगरकोटसम्म आन्तरिक पर्यटकले भरिएका छन् । यहाँका अधिकांश होटरलहरु आन्तरिक पर्यटकले भरिएका छन् ।

-रमेश गिरी

भक्तपुर, १७ पुस । कोरोना भाइरस सङ्क्रमणका कारण गत चैतदेखि थलिएको पर्यटक व्यबसाय चलायमान हुने क्रम सुरु हुदै गर्दा अंग्रेजी नयाँवर्ष–२०२१ ले आशा जगाएको छ ।

अग्रेजी नयाँ वर्ष मनाउन भक्तपुरका पर्यटकीय क्षेत्र रानीकोटदेखि नगरकोटसम्म आन्तरिक पर्यटकले भरिएका छन् । यहाँका अधिकांश होटरलहरु आन्तरिक पर्यटकले भरिएका छन् ।

नयाँ पर्यटकीय गन्तव्य बन्दै आएको सूर्यविनायक नगरपालिका ७ गुण्डु र ८ सिपाडोलको संगमस्थल ऐतिहासिक रानीकोटमा अधिकांश होटलहरु आन्तरिक पर्यटकले नै भरिएका छन् ।

यहाँबाट बिहान देखिने सुन्दर हिमाली दृश्यसंगै सूर्योदयको झुल्को हेर्नेहरुको आज वहान भीड थियो भने रातभरी नाचगान गरी नयाँवर्षको उल्लासमय स्वागत गर्न स्वदेशी पर्यटकको घुँइचोले होटल पाउन मुश्किल थिए ।

उता भक्तपुरको अर्को पर्यटकीय गन्तव्य नगरकोटमा अंग्रेजी नयाँवर्षको पहिलो सूर्योदयलाई स्वागत गर्न स्वदेशी पर्यटकले पुगेका थिए । हिजो बेलुका बास बसेर आज विहान सूर्योदयसंगै हिमाली दृश्य हेर्ने पर्यटकको आगमन नगरकोटमा बाक्लो थियो ।

हरेक वर्ष विदेशी पर्यटकले भनिे यहाँका पर्यटकीय क्षेत्र कोरोना महामारीका कारण विदेशी पर्यटक नआए पनि स्वदेशी पर्यटकको आगमन देखेर होटल व्यबसायीहरु उत्साहित भएका छन् ।

समुद्री सतहबाट २००० मिटर उचाइमा रहेको भक्तपुरको सूर्यविनायक र काभ्रेको पनौती नगरपालिकाको सिमानामा पर्ने रानीकोटबाट काठमाडौं उपत्यका र भक्तपुर नगर मात्र होइन, बिभिन्न हिमशृंखला समेत अवलोकन गर्न सकिन्छ ।

यहाँबाट सूर्योदयसंगै कञ्चनजंघा, मकालु, सगरमाथा, चोयु, सिसापाङमा, मनास्लु, अन्नपूर्ण, माछापुछ्रे, गौरीशंकर, धौलागिरि तथा लाङटाङजस्ता आठ हजार मिटरभन्दा अग्ला आठवटा हिमाल हेर्न सकिने भएकाले पछिल्लो समय रानीकोट पर्यटकीय गन्तव्य बन्न थालेको भिलेज हाईल्याण्ड रिसोर्ट रानीकोटका संचालक रामसुन्दर बकेँ बताउनुहुन्छ ।

सहज पक्कि सडकदेखि सूर्यविनायक–रानीकोट–आशापुरी एवं सूर्यविनायक–रानीकोट–फुल्चोकी पदयात्राको रुटले रानीकोट पर्यटकको रोजाइमा पर्न थालेको बताउदै उहाँले कोरोना भाइरसको महामारीको बिचमा पनि नयाँवर्ष २०२१ को उत्साह उमंग स्वदेशी पर्यटकले थपेकोे उहाँ बताउनुहुन्छ ।

नेपाली नयाँवर्ष २०७७ सुनसान बनेको पर्यटकीय क्षेत्रहरु अंग्रेजी नयाँवर्षमा चलायमान बनेको बताउदै होटल व्यवसायी बकेँ भन्नुहुन्छ–“रानीकोट ऐतिहासिक रुपले मात्र नभएर सुन्दर दृश्य अवलोकनका लागि पनि उपयुक्त स्थान हो, १२ महिना पर्यटकको आकर्षण बन्न थालेको रानीकोटबाट देखिने हिमाल र सूर्योदयले नयाँवर्षमा त झन पर्यटक खचाखच हुने गर्थे कोरोनाको बाबजुत पनि यसवर्ष आन्तरिक पर्यटकको घुइचो लागेको देखेको पर्यटन व्यबसाय पुन चलायमान हुने आशा पलाएको छ ।”

रानीकोटमा रु. १६ करोडको लागतमो भिलेज हाईल्याण्ड रिसोर्ट होटल संचालनमा आएलगत्तै कोरोनाका कारण बन्द गर्नु परेपनि अहिले भने पुनः आशा जगाएको बकेले बताउनुभयो । आफ्नो होटल सात दिन अघिदेखि नै बुक भएकाले कतिपय आउन चाहने स्वदेशी पर्यटकलाई पनि ठाउँ दिन नसकेर अन्य होटलमा पठाउनु परेको भन्दै उहाँले आज पनि होटलमा आन्तरिक पर्यटकले भरिएको बताउनुभयो ।

कोरोनाका कारण गत चैतदेखि नै बन्द रहेका नगरकोटका सानादेखि ठूला होटलहरुधमाधम खुल्न थालेका छन् । कोभिड–१९ को सङ्कूमण विश्वव्यापी भएपछि रित्तिएका यहाँका होटलहरु नयाँ वर्ष २०७७ मा पहिलो पटक खाली भएपनि अंग्रेजी नयाँवर्ष २०२१ मा आगमनमा भने विदेशी पर्यटक नभए पनि स्वदेशी पर्यटकको आगमन राम्रो रहेको नगरकोट बसपार्कमा रहेको होटल मेरिगोल्डका संचालक गोकुल लामिछाने बताउनुहुन्छ ।

“मैले होटल क्षेत्रमा काम गरेको २० वर्ष बढी भयो तर यसरी होटल सुनसान भएको पहिलो पटक हो, हरेक नेपाली र अंग्रेजी नयाँवर्षमा एक महिनाअघिदेखि सबै होटल बुक हुन्थे, सबै होटल भरिन्थे” उहाँ भन्नुहुन्छ “तर यसवर्ष नेपाली नयाँ वर्षमा सुनसान रहे पनि अंग्रेजी नयाँ वर्षमा भने आन्तरिक पर्यटकको आगमनले पर्यटन क्षेत्रमा पुन आशा पलाएको छ ।” उहाँले अधिकांश होटलमा ६५ प्रतिशत आन्तरिक पर्यटकको आगमन भएको बताउनुभयो ।

नगरकोट नाल्दुम पर्यटन विकास समितिका उपाध्यक्ष धनबहादुर लामाले अग्रेजी नयाँवर्षमा विदेशी पर्यटकले खचाखच हुने नगरकोट यसवर्ष स्वदेशी र्यटकको आगमन राम्रो रहेको बताउनुभयो । कोरोना भाइरसका कारण अधिकांश होटलका कामदार घर फर्किएका र होटलहरु बन्द भएको पनि पर्यटन व्यबसाय पुन चलायमान हुने देखिए पछि होटलहरु पुनः सञ्चालनमा आएको बताउनुभयो ।

सन् २०२० को अन्तिम दिनलाई विदाई गर्ने र २०२१ को पहिलो दिनको सूर्योदयलाई स्वागत गर्ने यसवर्ष विदेशी पर्यटन नभएर खल्लो भएपनि स्वदेशी पर्यटकको आकर्षण र आगमन बढेपछि ओरालो लागेको पर्यटन व्यबसायमा आशा पलाएको बताउनुभयो ।