६ करोड २६ लाखको लागतमा जुद्ध बारुण यन्त्र भक्तपुरको भवन बन्दै

नारायण थापा
भक्तपुर, १५ मंसिर ।
भक्तपुरको दूधपाटीमा रहेको जुद्ध बारुण यन्त्र कार्यालयको भवन शिलन्यास कार्यक्रम सम्पन्न भएको छ । ६ करोड २६ लाख ४९ हजार ८ सय ११ रुपैयामा बन्न लागेको सो भवनको जिल्ला समन्वय समिति भक्तपुरका प्रमुख नवराज गेलाल, जुद्ध बारुण यन्त्र कार्यालयका प्रमुख सुरज निरौला र केन्द्रिय आयोजना कार्यन्वयन इकाईका कार्यकारी निर्देशक श्याम किसोर शिंहले संयुक्त रुपमा शिलन्यास गर्नुभएको छ ।

भवन ब्लक ‘ए’ र ब्लक ‘बि’ गरी एउटा साढे दुई तल्ले र अर्को तिन तल्ले नयाँ भवन बन्नेछन, भने दुबै भवनमा ४÷४ वटा फयर ब्रिगेड गाडि अट्ने ठाउँ सभाहल र कर्मचारीहरुका लागि बस्ने कक्षको निर्माण हुने भएको छ । ७७ वर्षे इतिहास बोकेको जुद्ध बारुण यन्त्रको कार्यालय अलपत्र अवस्थामा रहेको भवन लामो समयपछि व्यवस्थित रुपमा निर्माण हुन लागेको हो ।
सरकारले दमकलको जिम्मेवारी स्थानीय तहलाई दिने निर्णय गरेपनि ललितपुर र काठमाडौंमा रहेका जुद्ध बारुण यन्त्र स्थानीय तहले नै जिम्मेवारी लिएका छन् । भक्तपुर नगरपालिकाले भने अझै पनि जिम्मेवारी लिन नमानेको अवस्था रहेको छ । भक्तपुरको जुद्ध बारुण यन्त्र भने गृह मन्त्रालय अन्तर्गत सञ्चालित रहेको छ ।
७७ वर्षदेखि सेवारत बारुण यन्त्रले कोरोना महामारीबीच भवन शिलन्यास गरेको छ । तत्कालीन राणा सरकारले वि.सं. २००१ मा तीन रोपनी नौ आना सार्वजनिक जग्गामा भवन निर्माण गरी दूधपाटीमा जुद्ध बारुण यन्त्रको कार्यालय स्थापना गरेको थियो । त्यसयता बारुण यन्त्रले निरन्तर सेवा दिँदै आइरहेको छ । कार्यालयसँग पर्याप्त दमकल छैनन् भने, भएका दमकल पनि बिग्रिएर अवस्थामा छन् ।
कार्यालयमा भएका ६ वटा दमकल मध्ये चारवटा बिग्रिएको अवस्थामा रहेका छन् । मध्यपुर थिमि नगरपालिका र सिद्धि स्मृति अस्पतालले दिएको दमकल भने चालू अवस्थामा रहेको छ ।
भक्तपुर, काठमाडौं, ललितपुर, काभ्रे, सिन्धुपाल्चोक र रामेछापसम्म पुगेर समेत जुद्ध बारुण यन्त्र भक्तपुरले सेवा दिने गरेको छ । भवन शिलन्यास कार्यक्रममा जिल्ला समन्वय समिति भक्तपुरका प्रमुख नवराज गेलालले विभिन्न चुनौतीहरुका बाबजुत पनि कार्यालयले विपतका समयमा समेत चुस्त–दुरुस्त र प्रभावकारी सेवा दिदै आइरहेका बताउनुभयो । कार्यालयमा स्रोतसाधनको अभावका बाबजुद पनि लामो समयदेखि सेवा दिदै आइरहेको जुद्धलाई दिगो बनाउन अब बन्ने नयाँ भवनले सहयोग गर्ने बताउनुभयो ।
कार्यक्रममा कार्यालय प्रमुख सुरज निरौला, नेपाल पत्रकार महासघं जिल्ला शाखा भक्तपुरका अध्यक्ष पुष्कर बुढाथोकी, केन्द्रिय आयोजना कार्यन्वयन इकाईका कार्यकारी निर्देशक श्याम किसोर शिंह, जिल्ला प्रशासन कार्यालयका प्रशासकिय अधिकृत यज्ञराज जोसि, जिल्ला आयोजना कार्यन्वयन इकाईका महालक्ष्मी जोशी र अनन्त प्रसाद आचार्य लगाएतले कार्यक्रममा जुद्ध बारुण यन्त्र भक्तपुरको संरक्षण र विकासमा हामी सबैको जिम्मेवारी भएकाले सबैले आआफ्नो क्षेत्रबाट पहल कदमि गर्नुपर्ने बताउनुभयो ।